|
Die haglikheid van die Ruyterwacht-
plakkerskamp
In die Ruyterwacht Plakkerskamp, naby
die Grand West Casino in die Wes-Kaap woon
Afrikaanssprekende gesinne in haglike omstandighede. Die
samestelling van die inwoners is vier wit gesinne, twee
wit/bruin gemengde gesinne, een bruin gesin, twee wit
middeljarige dames, vier wit mans en twee bruin mans.
Die omstandighede in die kamp is uiters haglik.
Veral met die huidige weerstoestande
wat ondervind word in die Wes-Kaap Provinsie. Daar is
vier woonplekke waaraan ons uiters dringend aandag sal
moet skenk.
In die woonplek wat die ergste deur
die weersomstandighede geraak word, woon 'n Afrikaanse
gesin met hul vyf kinders, ouderdomme 2jr, 5 jr, 8 jr,
12jr en 16jaar oud. Die drie jongste kindertjies in die
woonplek staan enkel diepte in die water. Hul kan nie
die langbroekies dra wat ons afgelewer het nie, want
alles word nat.
Hul loop kaalvoetjies met kort
broekies en dis baie koud op die oomblik. Dit is net
water regdeur hul woonplek. As jy van die bed afklim is
jy in die water. In die woning is al hul klere, skoene
en beddegoed nat. 'n Mede-werker, Helma Snyman wat
Saterdag gesien het wat die toestand werklik is, het
voorgestel dat ons dringend water stewels en reenpakke
vir die kinders kry, dit sal onmiddellike verligting
bring deur hulle beentjies en voetjies warm te hou. Die
lewensnoodsaaklike oplossing is om dringend 'n Wendyhuis
te kry wat groot genoeg is om die gesin te huisves.
Ons tweede groot krisis op die
oomblik is twee wit dames, tannie Martie en tannie
Yvonne wat elk in 'n hout kamertjie bly. Hul woonplek is
van afval hout aanmekaar gesit en glad nie waterdig nie.
Hulle het net spasie vir 'n enkelbed. Hul klere hang
teen die hout mure en dak waar dit sopnat word. Hul
omstandighede is haglik. Ek voorstel dat ons dringend
probeer om een groot of twee kleiner wendyhuise (groot
genoeg om in te woon) aan te koop, dan is die probleem
opgelos.
Die vierde woonplek is so swak
aanmekaar geflans, dat plastiek velle of waterdigte
seile nie die probleem gaan oplos nie. Die voorstel is
dat gepoog moet word om die gesin te help met 'n
wendyhuis, karavaan of nuwe hout, sodat 'n woonplek
opgerig kan word.
Die noodplan is om dringend drie of
vier wendyhuise aan te koop as alternatiewe woonplekke.
Reelings sal met die naaste Launderette getref word dat
die inwoners hulle wasgoed en beddegoed wat nat is daar
laat was en droogmaak vir die rekening van Solidariteit
Helpende Hand Fonds Kaapstad tak. Groot hoeveelhede kos,
klere en komberse is Saterdag afgelewer. Ons is in noue
kontak met die Gemeenskapsleier in die kamp, mev Anne
Vykens en sal verdere aflewerings daar doen soos wat
versoek word.
Solidariteit Helpende Hand Fonds
Kaapstad tak moet dringend fondse insamel vir die
finansiering van bogenoemde projekte. Enige individue of
instansies wat bereid is om finansieel te help of
Wendyhuise kan skenk, kontak asseblief vir Erika Rossouw
sel 072 195 6581 of e-pos erikarossouw@lantic.net
|
