Die kultuurhistoriese museum bevat 'n wye reeks items wat wissel van 'n antieke vuurwapen versameling, items uit die vroeëre Voortrekker tydperk . Die museum kan besoek word per afspraak. Skakel Kokkie by: 053 207 0214

Na aanleiding van die verval van die Afrikaner se kultuurgoedere in die Republiek is Orania in die besondere posisie om van die beelde te akkommodeer en ontvang dan ook dikwels skenkings in hierdie verband. Sommige hiervan is te siene in die beeldetuin op die monumentkoppie.

Gedurende die Anglo-Boereoorlog het die destydse Ierse regering 'n bataljon soldate uit Ierland na Suid-Afrika gestuur om die Boere in hulle stryd teen die Britse mag by te staan. Indien dit nie was vir tydige waarskuwings vanaf goedgesinde bronne en borge nie, sou hierdie besonderse monument nie betyds vanaf Aucklandpark, Johannesburg verskuif kon word nie. Die Ierse monument is te siene regoor die Gemeenskapsaal en net oos van die Beeldetuin.

Die koeksister monument is te midde van die wydbesproke en gespotte aanmerkings van talle nasionale sowel as internasionale joernaliste opgerig om die deursettingsvermoë en moed van die Afrikanervrou te gedenk, wat met weinig finansiële bronne tot haar beskikking die vermoë besit om talle instellings tot stand te bring.